Noticias

  • Publicación da RC de MiniNo Queiles

    Esta nova versión de MiniNo, a 3.0, que bautizamos como Queiles, despois de darnos bastantes problemas (lembrade que somos só 2 persoas para MiniNo e PicarOS) por fin parécenos estable abondo como para que poidamos finalmente publicar a versión candidata (RC).

    Lembrarvos algúns datos xa publicados sobre ela:

    Tendo en conta que as máquinas obxectivo desta distribución adoitan ser bastante vellas é cotiá que teñamos temor á perda de datos por ser o disco tamén moi vello; para paliar este eventual problema temos xa instalado «Cronopete» (ver máis).

    Por mor da cantidade de problemas que nos estaba dando, especialmente coa reprodución de vídeos de Youtube, eliminamos o navegador Midori. No seu lugar deixamos configurada a base, para que quen o desexe poida instalar facilmente Tor Browser simplemente executando na terminal «sudo apt install torbrowser-launcher» ou mediante Synaptic instalar «torbrowser-launcher» (lembrarse de actualizar os repositorios antes) (ver máis).

    Tras xurdir unha serie de problemas na ferramenta que usabamos para compilar a ISO (procedente de remastersys) pola súa incompatibilidade co  novo núcleo, vímonos obrigados a recorrer ás ferramentas de Refracta. Isto implicou modificalo para axustalo ás nosas necesidades e a reescribir o noso instalador e modificar os de refracta (ver máis).

    Para axudarnos a corrixir fallos, seguimos coa petición de que nos informedes no foro específico.

    A imaxe e o ficheiro de comprobación Md5, podédela descargar de minino.galpon.org/ISO ou no apartado «Outras versións» en minino.galpon.org/es/descargas

    Esta publicación forma parte das actividades que GALPon realiza ao abeiro do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2017 da Xunta de Galicia.

  • Publicación da beta 3 e da amd64-experimental de MiniNo 3.0 Queiles

    Finalmente temos xa lista para a súa descarga a beta 3 da nova MiniNo 3.0 Queiles.

    Tal e como vos comentábamos na noticia anterior, tras os problemas co construtor da ISO e os instaladores, presentamos xa as correccións. Froito destas correccións decidimos que a partires de agora haberá unha ISO diferente por núcleo. Neste momento só está dispoñíbel o núcleo 686-pae e unha versión experimental do núcleo amd64 empregando o «kernel» de liquorix (actualmente 4.6-1.dmz.1).
     

    É a nosa intención seguir traballando co núcleo de 64 bits a fin de obter unha imaxe UEFI compatible.

    Ámbalas dúas imaxes podedes descargarlas de minino.galpon.org/ISO ou no apartado «Outras versións» en minino.galpon.org/gl/descargas

  • Demora na publicación da RC de MiniNo Queiles

    Tras xurdir unha serie de problemas na ferramenta que usabamos para compilar a ISO (procedente de remastersys) pola súa incompatibilidade co novo núcleo, vímonos na obriga de recorrer ás ferramentas de Refracta. Isto implicou modificalas para axustalas as nosas necesidades e a reescribir o noso instalador e modificar os de refracta.

    Isto levounos á necesidade de publicar unha nova beta, que quedará definida como beta3. Esta publicación anunciaremola en días vindeiros..

    Aproveitando o atraso decidimos incorporar xa o éuscaro, aínda que nesta versión beta no estarán traducidas todas as nosas ferramentas, si que será xa operativo o novo idioma.

    Ademais, nesta versión, disporemos de 4 instaladores (en realidade 5) que operan do seguinte xeito:

    • O modo desasistido é o recomendado para  os máis inexpertos.
      • Este modo ten dúas variantes:
        • Automática: É a máis sinxela, ocupa todo o disco.
        • Manual: Permítenos elixir a partición na que queremos facer a instalación. Non permite configurar ningún parámetro.
    • O modo básico permítenos axustar algúns parámetros, lémbranos o instalador de Debian. Permite escoller o disco de destino e instalar a partición /home separada, mais non permite configurar usuarios.
    • O modo avanzado é moi sinxelo, permítenos configurar o usuario e o seu contrasinal. O arrinque pono sempre no MBR do primeiro disco (sda).
    • O modo experto está indicado só para usuarios con experiencia na configuración de múltiples particións.

  • MiniNo Queiles en éuscaro

    Grazas a Gonzalo Uriarte, estamos a traballar na tradución ao éuscaro do MiniNo Queiles, xa non nos da tempo a telo a punto para a publicación 3.0, mais queremos ter integrado este novo idioma na primeira revisión (3.1)

  • Publicación da beta2 de MiniNo 3.0 Queiles

    Vimos de publicar a versión de probas «beta2» do futuro MiniNo Queiles 3.0.

    Por mor da cantidade de problemas que nos estaba a dar, especialmente coa reproducción de vídeos de Youtube, eliminamos o navegador Midori. No seu lugar deixamos configurada a base, para que quen o desexe poida instalar doadamente Tor Browser simplemente executando na terminal «sudo apt install torbrowser-launcher» ou mediante Synaptic instalar «torbrowser-launcher» (acordarse de actualizar os repositorios antes). Non o instalamos definitivamente xa que no inicio hai que facer unha mínima configuración que depende de cada caso en concreto e, incluso, hai quien nunca o usa por non comprender a forma de funcionamento da rede Tor.

    Para os que teñen especial interese na preconfiguración de Tor browser, indicarlles que seguimos as idicacións de: https://www.torproject.org/docs/debian.html.en#ubuntu coa modificación de que a última liña aplicada foi, simplemente:
    $ sudo apt install deb.torproject.org-keyring, xa que «tor» instalase como dependencia de «torbrowser-launcher»

    Tamén fixemos unha substitución, cambiando UMPlayer, que quedou bastante obsoleto, por SMPlayer.

    Esta é xa a última versión de probas e en 2 semanas +/- publicaremos a RC (candidata final) e a principios de xuño a versión final.

    Si tendes curiosidade por probala, podedes descargar a imaxe ISO e o ficheiro de comprobación md5

    Para axudarnos a corrigir fallos, podedes informarnos no foro específico.

  • MiniNo e PícarOS na xornada LibreTeo

    O 30 de abril o Concello de Teo vai celebrar LibreTeo.

    Un evento centrado na liberdade das persoas e o tremendo potencial que ten a xente cando colabora en proxectos libres. Con propostas e referencias nos sectores do software, a cultura e o coñecemento. Todas as charlas e obradoiros están dirixidos a todos os públicos, cunha linguaxe sinxela e sen tecnicismos. :-)

    Nós estaremos presentes de 17:20 a 18:00, falando de «Distribucións de Linux lixeiras e para cativos»

     

  • PícarOS nas «JORNADAS DE BUENAS PRÁCTICAS DOCENTES 2016», Tudela, Navarra

    Mañá martes 26 de abril de 17.30 a 20.15 PícarOs estará presente nas «JORNADAS DE BUENAS PRÁCTICAS DOCENTES 2016» no CAP de Tudela, Navarra.
    DIRIXIDO A: Todo o profesorado de infantil, primaria, secundaria e educación especial.
    XUSTIFICACIÓN:

    • A difusión das experiencias de aula é unha forma de dar a coñecer as boas prácticas e de valorar o compromiso e a dedicación dos/as docentes.
    • Dar a coñecer experiencias de aula motiva e fai reflexionar sobre os procesos de ensino-aprendizaxe, tanto aos docentes que asisten, como aos que presentan as propostas.
    • Nestas xornadas daranse a coñecer experiencias de aula sobre temas que suscitan interese polo seu contido ou pola súa aplicación didáctica.

    OBXECTIVOS:

    • Compartir e difundir estratexias, recursos e ideas entre os/as docentes, que propicien o debate, o desenvolvemento e a innovación, e que contribúan ao enriquecemento dos/as docentes asistentes e do seu traballo nas aulas.
    • Acercar as diferentes etapas educativas entre sí

    Máis info en: http://formacionprofesorado.educacion.navarra.es/hasi/convocatorias/file...


     

  • 8 novos videotitoriais

    Na nosa sección de videotitoriais poderedes ver 8 novos tutoriais, desta van adicados á edición gráfica, con solucións para actividades de primaria.

    1. Crear fotoalbumes e minilibros de 8 páxinas
    2. Crear marcapáxinas
    3. Edición gráfica para Infantil e primeiros cursos de Primaria
    4. Xirar, redimensionar, recortar, quitar o fondo dunha imaxe...
    5. Crear pósters e estereogramas
    6. Quitar a cor dunha imaxe ou un obxecto dunha foto
    7. Xeometría, caligramas, calendarios...con Inkscape
    8. Recompilador de imaxes e cómo crear crebacabezas fácilmente en PícarOS

  • Outro colexio madrileño «Picarizado»

    O CEIP Miguel Hernandez de Leganés (Madrid) instalou PicarOS na súa aula de informatica.

  • Publicación da beta1 de MiniNo 3.0 Queiles

    Xa está dispoñíbel a versión de probas «beta1» do futuro MiniNo Queiles 3.0.

    Tendo en conta que as máquinas obxectivo desta distribución adoitan seren bastante vellas é frecuente que teñamos temor á perda de datos por seren o disco tamén moi vello; para paliar este eventual problema temos xa instalado «Cronopete».

    Cronopete é un programa moi sinxelo para realizar copias de seguridade do noso cartafol persoal, é un programa semellante a Time Machine de Mac e ten unha interface moi simple. Na pantalla principal atoparemos información sobre a última copia de seguridade realizada con Cronopete e a próxima copia programada para realizar con Cronopete.

    Cronopete xestiona as copias de seguridade do noso «/home» podendo eliminar da copia de seguridade algúns cartafoles que non queiramos que se copien. Isto é moi útil para realizar copias de seguridade do cartafol «documentos» (por exemplo), e crear un cartafol dentro de documentos do que non queremos que realicen copias de seguridade e aí engadiremos os ficheiros que queiramos manter a marxe das copias de Cronopete.

    Un dato importante de Cronopete é que non se pode realizar copias de seguridade dentro do mesmo disco do sistema do que estamos realizando a copia. Polo que teremos que dispoñer dun disco (ou unha memoria removible) externo conectado por USB para realizar as copias de seguridade. Inda que isto poida parecer un pouco raro, é lóxico que non realicemos copias de seguridade no mesmo disco xa que en caso de fallar dito disco, perderemos tanto os ficheiros orixinais como as copias.

    A fin de que sirva de axuda para as consultas no foro ou para facer calquera instalación de controladores específicos de hardware, instalamos tamén «inxi» unha potente orde de consola, da que podedes ver formas de uso aquí e aquí.

    Se tendes curiosidade por probala, podedes descargar a imaxe ISO e o ficheiro de comprobación md5

    Para axudarnos a corrixir fallos, podedes informarnos no foro específico.

Páxinas

máis